Интересный форум про Азербайджана, об Азербайджанцев, Видео уроки азербайджанского языка для русских, словари, отношения азербайджанцев русским, о любви, о браке, история


Вы не подключены. Войдите или зарегистрируйтесь

Форум Азербайджан Душа Моя » Религия и атеизм ♥ ♥ ♥ Din və ateizm » Azərbaycan Məsihi forum » Ümumixristian forum » Hirodun İsanı öldürmək cəhdi (Matta 2:12-23)

Предыдущая тема Следующая тема Перейти вниз  Сообщение [Страница 1 из 1]

Sevgi
Sevgi
Yeni

4. Hirodun İsanı öldürmək cəhdi (Matta 2:12-23)


MATTA 2:12-15 
12 Sonra röyada Hirodun yanına qayıtmamaq üçün xəbərdarlıq aldıqlarına görə başqa yolla öz ölkələrinə getdilər. 13 Müdrik adamlar yola düşəndən sonra Rəbbin bir mələyi Yusifə röyada görünərək dedi: «Qalx, Körpə ilə anasını götür, Misirə qaç. Mən sənə xəbər verənə qədər orada qal. Çünki Hirod Körpəni öldürmək üçün axtarmağa başlayır». 14 Beləliklə, Yusif qalxdı, həmin gecə Körpə ilə anasını götürüb Misirə yollandı. 15 Hirod ölənə qədər orada qaldı. Bu, Rəbbin peyğəmbər vasitəsilə söylədiyi söz yerinə yetsin deyə baş verdi: «Öz Oğlumu Misirdən çağırdım». (Huşə 1:11)
Şeytan Məsihi və Onun ardınca gedənləri məhv etmək istəyir. Lakin Allah seçdiyi Körpəni, çarmıxda xidmətini tamamlayacaq olan Məsihi qoruduğu kimi, Allahın Öz iradəsi ilə gerçəkləşdirdiyi xilasa heç kəs nə mane ola bilər, nə də onu gecikdirə bilər, çünki Allah-Taala Öz elçilərini sona qədər qoruyar! Allah Özü bu mömin münəccimlərə röyada dedi ki, hiyləgər Hirodun yanına qayıtmasınlar. Güman ki, bu röyanı görən onlardan biri deyil idi, onların üçü də eyni gecə yuxuda bu xəbərdarlıqı eşidiblər və bu röyanın Rəbbin işi olduğunu dərk ediblər. Bəlkə də onlar hələ Hirodla və ali məclislə görüşərkən onların üzlərindən yağan hiyləni, istehzanı, nifrəti sezmişdilər. Axırda münəccimlər gizlicə İordan vadisindən keçən yoldan geri qayıtmağı qərara aldılar. Kim iman vasitəsilə Məsihlə ruhani əlaqəyə giribsə, o səma ilə əvvəl ağlına belə gəlməyən ünsiyyət qurmağa nail olur.
Yusif rahatlıq tapa bilmirdi – münəccimlərin ziyarəti və hədiyyələri onu narahat edirdi. Yuxuya getməzdən əvvəl dua edərək, Allahdan ona yol göstərməsini istəyirdi və Allah ona Öz izzətli mələyi vasitəsilə ailəsinin məruz qaldığı böyük təhlükədən xəbər verdi – padşah Hirod balaca Padşahı məhv etmək əzmindəydi. Allah o zalımın hiyləsini bilərək, Yusifə ailəsi ilə birlikdə Misirə getməli olduğunu açıqladı.
Yusif ikinci dəfə insanlardan daha çox Rəbbinə imanla itaət etdi. Gecə yarısında durdu, Məryəmi oyatdı və onlar Körpə İsa ilə birlikdə qaçdılar. Gecə ikən Xevrona çatdılar. Oradan cənuba doğru getdilər, səhra yolu ilə Misirə tərəf səyahət etdilər. Müjdəçi Matta onların yolda çəkdikləri əziyyətlər barədə heç nə yazmayıb, piyada yoxsa heyvanlara minərək getdiklərindən də xəbər verməyib. O ancaq şəhadət etdi ki, Allahın məsləhəti tədricən həyata keçirilir və heç bir şey ona əsla mane ola bilməz.
Bəziləri bu ayələrdə Körpənin adının anasından öncə çəkildiyinə diqqət yetirirlər: «Qalx, Körpə ilə anasını götür…». Çünki Körpə baş qəhrəmandır. Məryəm də burada Yusifin arvadı olaraq deyil, Körpənin anası olaraq adlandırılır və bu Məryəm üçün ən böyük şərəfdir. Yusif, Kənan torpağında qul kimi satılaraq qardaşlarının qəzəbindən canını qurtaran o qədim Yusif kimi deyil idi. Misirdə onlar Rəbbin məbədindən və məbəddəki ibadətdən uzaqda idilər. Onların ətrafı bütpərəstliklə dolu idi, lakin Allah orada da onlara görünürdü, çünki O «qurban deyil, mərhəmət istəyir». Onlar Rəbbin məbədindən uzaqda olsalar da, məbədin Rəbbi onlarla idi. Saleh adamlar Allahın ibadətə dair qanunlarından uzaqlaşmağa və hiyləgər adamlarla oturub-durmağa məcbur olurlar, amma bu, günah deyil. Lakin o adamlarla birlikdə bütpərəstlikdə iştirak etmək günahdır.
Allahın övladlarının Misirdə, qərib ölkədə, köləlik diyarında olmaları heç təəccüblü deyildir. Ancaq Allah onları axtaracaq və mütləq oradan çıxardacaq. Onlar Misirdə gizlənirlər, lakin Allah onları orada tərk etmir. Allahın seçdiklərinin hamısı bir zamanlar təbiətçə Allahın qəzəbinə düçar idi, ruhani Misirdə doğuldu, ancaq təzələndikdən sonra Misirdən azadlığa çıxmağa çağırılırlar.
Münəccimlərin hədiyyə verdiyi qızılda Allahın Körpənin qayğısına qalmasını görmək mümkündür. Allah onları səyahət etmək üçün kifayət qədər pulla təmin etmişdi. Rəbb həmişə Öz övladlarının qayğısına qalır, kəskin ehtiyac vaxtında onlara kömək edir.
İsa b.e.ə. 4-cü ildə Hirod ölənə qədər ailəsi ilə Misirdə qaldı. Hirodun ölüm tarixi İsanın miladi təqvimin başlanğıcından əvvəl doğulmasını bir daha təsdiq edir. Bu gün biz bilirik ki, iqumen Kiçik Dionisi b.e. 533-cü ildə təqvimini düzəldərkən səhvə yol verib: Məsih "sıfırıncı ildə" deyil, miladi tarixin başlanmasından 7-8 il əvvəl anadan olub.
Matta bizə tarixin daha dərin anlayışını göstərdi: Əhdi-Ətiq xalqı Allahdan Misiri tərk etmək çağırışını aldığı kimi, eyni şəkildə Allah Öz Oğlunu qürbətdən Öz doğma torpağına qayıtmağa çağırdı. Bu ayədə İsadan Matta Müjdəsində ilk dəfə "Allahın Oğlu" kimi bəhs edilir. Bu şəhadət Müjdəçinin cəsur olduğunu bildirir, çünki yəhudilər bu cür sözləri küfr sayırdı və belə danışan adamın daşlanmasını tələb edirdilər. İsa Allahın Oğlu ola-ola məğrur və amiranə xarakterə malik deyildir. O kiçikliyindən bəri rədd olunub, qüdrət sahibləri tərəfindən təqiblərə məruz qalıb, kündür (izzət) ilə birlikdə mirranın (əziyyətlərin) olduğunu uşaqlığından Öz təcrübəsində görüb. Çətin vaxtlarından əvvəl Onun qayğısına qalan Səmavi Atası, qürbətdə yaşaya bilməsi üçün Ona kifayət qədər qızılı göndərmişdi.
DUA: Ey Ata, Sənə səcdə qılırıq, ey Rəbbimiz İsa Məsih, Sənə də səcdə qılırıq, çünki daim Sənə qarşı dura biləcək padşah və ya rəhbər yoxdur! Sən qəlbimin sirlərinə agahsan, Sənin Oğlunun düşmənləri ilə bir sırada olmayım deyə, məni yoxla və təmizə çıxart! Qoru məni, ya Rəbb, mən Sənin sevimli Oğluna məhəbbət bəslədiyimə görə rədd olunduqda, təqiblərə və nifrətə məruz qaldıqda, Sən məni Öz himayəndə saxla!
SUAL:
[list="color: rgb(0, 0, 0); font-family: Arial, Helvetica, sans-serif; font-size: 14.6667px; background-color: rgb(255, 255, 255);"]
[*]Allah körpə İsanı və valideynlərini Hirodun əlindən necə xilas etdi?

[/list]

Sevgi
Sevgi
Yeni
MATTA 2:16-18 
16 Hirod müdrik adamlar tərəfindən axmaq yerinə qoyulduğunu görəndə çox hiddətləndi. O, müdrik adamlardan öyrəndiyi vaxta görə Bet-Lexem və onun ətrafında yaşayan iki və iki yaşdan aşağı körpə oğlan uşaqlarını öldürtdü. 17 Beləliklə, Yeremya peyğəmbər vasitəsilə söylənən bu söz yerinə yetdi: 18 «Ramada bir səs eşidildi, ağlaşma və böyük fəryad səsləri! Rəhilə uşaqları üçün ağlayır, təsəlli istəmir. Çünki onlar daha yoxdur». (Yar. 35:19; Yer. 31:15)
Hirod elə bilmişdi ki, münəccimlər ondan qorxduqları, ona hörmət etdikləri üçün anadan olmuş Körpə barədə öyrənən kimi onun yanına qayıdacaqlar. Lakin o tezliklə bu adamların ona xor baxdıqlarını başa düşdü. Hansı körpənin Məsih olduğunu, onun harada yaşadığını ona xəbər vermədiklərinə görə Hirod həddən artıq hiddətləndi. O zaman Hirod keçimşdə dəfələrlə etdiyi kimi, amansızcasına davrandı.
Hirod edomlu olduğundan, yəhudilərə qarşı ədavət onun qanında idi. Uşaqlar həmişə insanların qanunlarının, hətta bəşəri təbiətin xüsusi qayğısı və himayəsi altında olublar və olacaqlar. Lakin günahsız insanlarla rəhmsizcəsinə rəftar edən Neron kimi, bu zalım padşah da qəzəbində o dərəcədə qəddar olub ki, balaca uşaqları qırıb. Hirod hakimiyyətdə olduğu müddətdə həmişə qan tökməyi sevib. Bu hadisədən bir az öncə o, yəhudi ali məclisinin bütün üzvlərini öldürtmüşdü. Ancaq bu vəhşi kişinin gözündə qan tökmək susuzluğu yatırtmaq üçün su içmək kimi idi. Özü də susuzluğu içtikcə artırdı. Hirodun yaşı yetmişi ötmüşdü və ağlı başında deyil idi, çünki iki yaşdan kiçik uşaqlardan qorxurdu. O, öz uşaqlarına da qayğı göstərmirdi, onların rifahı üçün çalışmırdı, hətta iki oğlunu – Aleksandr və Aristobulu öldürtdürmüşdü, ölümündən beş gün öncə isə oğlu Antipatarı da öldürtdürüb.
Belkəliklə, Hirod yalnız öz məğrur, qəddar, vəhşi ehtirasını yatışdırmaq üçün bu vəhşi hadisəni törətdi.
Bütpərəst tarixçi Makrobius nəql edir ki, qeysər Avqust Hirodun o köprələrlə birlikdə öz oğlunu da öldürtdüyünü eşidəndə: «Hirodun donuzu olmaq, oğlu olmaqdan yaxşıdır» dedi. Ölkənin adətinə görə donuzların öldürülməsi qadağan idi, lakin Hirodun öz oğlunu öldürməsinə heç bir maneə yox idi.
Bəzilərinin fikrincə, Bet-Lexem sakinlərinin bu fəlakəti onların Məsihə xor baxması və iman etməməsinin qisası olub. Axı Allahın Oğlunun doğulmasına sevinməyən adamların öz oğullarının ölümünə yas tutmasında ədalət var. Bet-Lexem sakinlərinin çobanların sözlərindən "heyrətə" gəldiklərini oxuyuruq, lakin bu sözləri sevinclə qəbul etdiklərini oxumuruq.
Burada haqqında danışılan peyğəmbərlik Məsihin gəlişinin bu qədər faciəli bir hadisəyə səbəb olduğunu qəbul edə bilməyən adamların etirazlarına cavab verməyə kifayətdir. Onlar deyirlər: «İsrailin təsəllisi olaraq gözlənilən Məsihin bu dünyaya gəlişi belə faciələrlə baş verə bilərmi, bu qədər kədərə səbəb ola bilərmi?»
Ola bilər, çünki Müqəddəs Kitab bunu xəbər vermişdi və Müqəddəs Kitabın bütün peyğəmbərlikləri yerinə yetməlidir. Bundan əlavə, bu peyğəmbərliyin qalan hissəsini düşünsək, Ramadakı "ağlaşma və böyük fəryad" hədsiz sevinci qabaqlayacaqdı, "Çünki çəkdiyin zəhmətin əvəzi veriləcək… Gələcəyin üçün ümid var" (Yer. 31:16-17). Vəziyyət pisləşdikdə, tezliklə düzələcək deməkdir. Onlar üçün bütün itirdiklərini əvəz edəcək Körpə doğulub.
Qəribədir ki, Bet-Lexem sakinləri çobanların və münəccimlərin sözlərinə inanmamışdılar. Körpə İsa onları maraqlandırmırdı. Onlar Körpəyə səcdə qılmağa gəlməmişdilər. Açıq-aydın əlamətləri görə-görə İsaya iman gətirmədikləri zaman, Allahın qüdrəti əli onların körpələrinin canını aldı. Buna bənzər, keçmişdə də ilahi cəza dəfələrlə İsrailin üzərinə gəlmişdi: Yeremya sürgün edilən xalqına yas tuturdu, Rəhilə doğuş sancısı içində əzab çəkib ölmüşdü və onu Bet-Lexemdə dəfn etmişdilər. Allah Öz qulu Yeremyanın yas tutub ağlamasına icazə vermədi, çünki o hadisə Onun iradəsi ilə baş vermişdi, Onun xalqının Özünə tərəf dönməsi üçün tərbiyəvi tədbiri olmuşdu (Yer. 31:15; Yar. 35:18). Fikir verin ki, bu hadisə ilə əlaqədar olaraq «söz yerinə yetsin deyə…» yazılmayıb, amma «söz yerinə yetdi…» yazılıb. Bunların arasında böyük fərq var. Şünki «söz yerinə yetsin…» deyildikdə, ilkin peyğəmbərlikdə xəbər verilən olay nəzərdə tutulur. Burada olduğu kimi, «Beləliklə, bu söz yerinə yetdi…» deyildikdə isə, bu hadisənin ilkin peyğəmbərliyindən fərqli bir mənada yerinə yetdiyi nəzərdə tutulur. Burada sitat gətirilən peyğəmbərlik ilk əvvəl Babil sürgünü zamanındakı İsrailə aid olmuşdu – peyğəmbər viran olmuş torpaqdan bəhs edərkən, Yaqubun sevimli arvadı, Bet-Lexemdə dəfn olunmuş Rəhilənin simvolundan istifadə etmişdi (Yar. 35:19). Rəhilə sanki ölümdən dirilib öz övladlarından xəbər alır, lakin onları orada tapmır. Düşmənlər tərəfindən sürgün edilmiş övladları üçün ağlayan Rəhilə təsəlli istəmir. Məsihin anadan olduğu zaman vəziyyət buna bənzəyirdi, çünki həqiqi Varis Özü zülmdən xilas olmaq üçün qaçmağa məcbur olub və yalançı padşah oralarda qalanların üstünə ac qurd kimi atılıb.
Bet-Lexem üzərində Allahın mühakiməsi bu şəhərin sakinlərini sevən Rəbbin bir tədbiri idi və tövbə edib Körpə İsaya tərəf dönmələri, Ona iman gətirmələri üçün idi.
Göründüyü kimi, Matta Rəbb İsa Məsihin körpəliyini yəhudilərin bir millət kimi förmalaşdığı ilk dövrünə oxşadır. İsanın Misirdən çıxışını yəhudilərin qədim çıxışı kimidir, ancaq İsa, yəhudi xalqının imansızlıqla məğlub olduğu mübarizədə qalib gələcəkdi. Həvari Matta İsanın körpəliyindəki hadisələri nəql etməyi başa çatdırarkən, Məsihin Nazaretdə böyüdüyünü bildirir və beləcə Onun bütün millətlər üçün əhəmiyyətini bir daha vurğulayır, çünki Nazaret Qalileyada, ölkənin sərhədinə yaxın yerləşirdi və beynəlxalq ticarətdə çox fəal iştirak edirdi. Orada xeyli çox əxlaqsızlıq və bütpərəstlik yayılmışdı. Bu səbəbdən Yəhudeya sakinləri ümumiyyətlə qalileyalılara, xüsusilə nazaretlilərə həqarətlə baxırdılar; bu yolla Məsihin həqarətə məruz qalacağına dair Müqəddəs Kitab peyğəmbərliyi yerinə yetməli idi.
DUA: Ey müqəddəs Allah, Sən ədalətlisən və əsla səbəbsiz cəza verməzsən. Biz Sənin əzəmətinə etinasız yanaşdığımıza, yoxsullara həqarətlə baxdığımıza, peyğəmbərliklərinə maraq göstərmədiyimizə görə həlak edilməyə layiqiq. Bizə mərhəmət et və xalqımıza da mərhəmət et, çünki günahlarımız göyə qədər çatır! Bizdə təqsirlərimizə görə peşmanlıq yarat, bizə pisliyimiz barədə bilik ver, bizi tövbəyə gətir və əqlən dəyişdir! Məsihin kəffarəsinə gözlərimizi aç və bizi Öz məhəbbətinlə doldur ki, biz gələcək qəzəbindən xilas olaq!
SUAL:
[list="color: rgb(0, 0, 0); font-family: Arial, Helvetica, sans-serif; font-size: 14.6667px; background-color: rgb(255, 255, 255);"]
[*]Allahın cəzalarının ali məqsədi nədir?

[/list]

Sevgi
Sevgi
Yeni
MATTA 2:19-21 
19 Hirod öləndən sonra Rəbbin bir mələyi Misirdə Yusifə röyada görünüb 20 dedi: «Qalx, Körpə ilə anasını götür, İsrail ölkəsinə qayıt. Çünki Körpənin canını almaq istəyənlər öldü». 21 Yusif qalxdı, Körpə ilə anasını götürüb İsrail ölkəsinə qayıtdı. (Luka 2:39; Yəh. 1:46)
Allah İsanın Misirdə illərlə yaşamasını, Misir mədəniyyəti içində böyüməsini istəmədi. O Yusifə röyada üçüncü dəfə xitab edərək öz vətəninə geri qayıtmağını, Yəhudeyadakı Bet-Lexemə deyil, şimali İsrail torpağına getməyi əmr etdi. Orada İsa kiçikliyindən ibrani və arami dillərini və Əhdi-Ətiqi öyrənərək inkişaf edə bilirdi.
Biz harasa köçürüksə, həmişə yolumuzu və önümüzdən gedən Rəbbi aydın görməliyik və Rəbbin əmri olmasa, sağa-sola dönməməliyik.
Allahın güclü əli, müqəddəs Körpəni məhv etməyə cəhd edən Hirodu aradan götürüb. Bütün çobanlar, padşahlar, peyğəmbərlər ölürlər, yalnız Allah və Oğlu İsa əbədi olaraq yaşayırlar. Pis hakimlər ölürlər və Məsihin bütün dünyadakı ardıcıllarından ibarət olan ruhani Bədənini məhv edə bilmirlər. Sən də yaşayan Rəbb İsanın adı uğrunda əziyyətə, yaxud çətin vəziyyətə düşsən, arxayın ol!
MATTA 2:22-23 
22 Amma Arxelanın öz atası Hirodun yerinə Yəhudeya padşahı olduğunu eşidəndə oraya getməyə qorxdu. Röyada xəbərdarlıq alaraq Qalileya bölgəsinə getdi. 23 Gəlib Nazaret deyilən şəhərdə məskən saldı. Bu, peyğəmbərlər vasitəsilə söylənən «Ona Nazaretli deyiləcək» sözü yerinə yetsin deyə baş verdi.
Böyük Hirod b.e.ə. 4-cü ildə şiddətli əzablarla öləndə, üç oğlunun hərəsinə ölkəsinin bir hissəsini vəsiyyət etmişdi: Arxela Yerusəlimi və ətrafını; Antipa Qalileyanı və İordanın o biri tayının cənub hissəsini; Filip isə Qolan bölgəsini, Xermon dağını və İordanın o biri tayının şimal hissəsini irs alıb. Atasının Yerusəlimdəki xələfi olan Arxela atası kimi zalım idi. Günlərin birində o öz ordusuna Yerusəlimin küçələrində gəzən üç min ziyarətçini qətlə yetirmək əmrini verdi. Vəhşiliyi və qəddarlığı o yerə çatmışdı ki, qeysər Avqust b.e. 3-cü ildə Arxelanı hakimiyyətdən azad edib Fransaya sürgün etdi. Onun bölgəsini isə Roma valisi Ponti Pilatın əlinə təslim etdi; bu Pilat, İsanı çarmıxa çəkilməyə məhkum edəcək adam idi. Beləliklə, bundan sonra Əhdi-Cədiddə Hirod barəsində oxuyanda, onun Qalileya və cənubi İordanın padşahı olan Antipa olduğunu anlamalıyıq.
Yusif Arxilanın Yerusəlimdəki qəddar hakimiyyəti barədə eşitdikdə, şübhəsiz, qorxdu və özünə sual verdi ki, məgər Allahın vətənə qayıtmaq əmri səhv idi? Amma o imanla yaşayan adam idi və bu vəziyyətdə yenə dua etdi. O zaman Allah dördüncü dəfə ona röyada danışdı və Qalileyaya getməyi buyurdu. Yusif Məryəmin doğma şəhəri olan və əvvəllər bir müddət yaşadıqları Nazareti seçərək orada məskən saldı. Tövratda heç adı çəkilməyən kiçik bir şəhər olan Nazaret İsanın dünyəvi vətəni olmuşdur.
Bu şəhərin adı Mattanın qulağında başqa bir ibrani sözə oxşar səslənirdi, o sözün mənası «şaxəli budaq» idi. Həmin budaq Yesseyin kötüyündən çıxacaq idi (Yeş. 11:1-2). Bu peyğəmbərlik, şaxəli budaq olan İsada Müqəddəs Ruhun dolğunluğuna şəhadət edir.
Nazaret şəhərinin ən mühüm mənası, İsanın çarmıxına mıxlanan lövhədə Pilatın yazdığı dörd sözü ilə ifadə olunub: «Yəhudilərin Padşahı Nazaretli İsa» (Yəh. 19:19).
DUA: Sənə səcdə qılırıq, ey rəhmli Səmavi Ata, çünki Sən dörd dəfə Yusifə röyada doğru yolu göstərdin və dərhal imanla itaət etməsi üçün Ona güc verdin. Sən Öz Oğlunu uşaqlıq illərində tam kamil qorudun. Bizi də qoru və tam imanla itaət etməyi bəxş et ki, biz Sənin Müqəddəs Ruhunun səsinə sevinclə cavab verək!
SUAL:

  1. Yusifə nə cür dörd vəhy verildi və bu vəhylər İncilin harasındadır?



Предыдущая тема Следующая тема Вернуться к началу  Сообщение [Страница 1 из 1]

Форум Азербайджан Душа Моя » Религия и атеизм ♥ ♥ ♥ Din və ateizm » Azərbaycan Məsihi forum » Ümumixristian forum » Hirodun İsanı öldürmək cəhdi (Matta 2:12-23)

Права доступа к этому форуму:
Вы не можете отвечать на сообщения